Datganiad Cyngor Gwynedd Mawrth 2014

Newyddion Gwych - dyma datganiad i'r wasg gan Cyngor Gwynedd.

Wynne Construction i adeiladu Academi Hwylio Cenedlaethol Cymru a Chanolfan Ddigwyddiadau ym Mhwllheli

Mae cwmni o ogledd Cymru wedi cael ei ddewis gan Gyngor Gwynedd i adeiladu Academi Hwylio Cenedlaethol Cymru a Chanolfan Ddigwyddiadau eiconig ym Mhwllheli.

Mae’r cytundeb rhwng Cyngor Gwynedd a chwmni Wynne Consturction yn caniatáu i waith ar y safle gychwyn ym mis Ebrill 2014 gyda’r cyfnod adeiladu yn parhau am 12 mis.

Y cytundeb diweddaraf yma yw’r olaf o’r contractau sydd yn gysylltiedig â phrosiect yr Academi Hwylio Cenedlaethol a Chanolfan Ddigwyddiadau gwerth £8.3 miliwn, sydd yn cael ei ariannu’n rhannol gan Gronfa Ddatblygu Rhanbarthol Ewrop drwy Lywodraeth Cymru. Mae’r gwaith ffordd eisoes wedi ei gwblhau ac mae gwaith morol ar y gweill ar hyn o bryd oddi fewn i’r harbwr.

Bydd adeilad yr Academi Hwylio Cenedlaethol a Chanolfan Ddigwyddiadau yn cynnwys prif neuadd ar gyfer defnydd hwylwyr a’r gymuned leol, ystafelloedd hyfforddiant ac addysgu a chyfleusterau arlwyo, mewn adeilad eiconig i gyd-fynd â lleoliad hwylio o’r radd flaenaf ym Mae Ceredigion.

Mae Cyngor Gwynedd wedi cyd-weithio gyda Wynne Consturcion yn y gorffennol ar sawl prosiect hynod lwyddiannus gan gynnwys prosiect Ysgol yr Hendre yng Nghaernarfon.

Dywedodd y Cynghorydd John Wynn Jones, Aelod Cabinet Cyngor Gwynedd gyda chyfrifoldeb am yr economi:

“Rydym yn hynod falch i weithio gyda chwmni Wynne Construction unwaith eto ar brosiect sylweddol fel hwn.

“Mae gan y cwmni enw arbennig o dda am gyflogi gweithwyr lleol a chefnogi contractwyr lleol, ac rydym yn edrych ymlaen at gyd-weithio gyda nhw i weithredu’r buddion cymunedol sydd wedi’u hymgorffori yn y cytundeb i sicrhau fod y gweithlu lleol a busnesau lleol yn gwneud y mwyaf o’r buddsoddiad sylweddol hwn yn yr ardal.

“Rydym yn rhagweld y bydd y prosiect hwn yn dod a buddion economaidd a chymunedol hirdymor i Bwllheli a’r ardal gyfagos.”

Mae’r Academi Hwylio Cenedlaethol Cymru a Chanolfan Ddigwyddiadau ym Mhwllheli wedi ei ariannu’n rhannol gan Gronfa Ddatblygu Rhanbarthol Ewrop drwy Lywodraeth Cymru.